ရှင်းလင်းမည်ဟု သတိပေးပြီးနောက် ပိတ်ထားသော စျေးများ ပြန်ဖွင့်ရန် မုံရွာစည်ပင်က လော်စပီကာဖြင့် လိုက်အော်
မုံရွာတွင် မြို့ပြပျောက်ကျားနှစ်ဖွဲ့က စည်ပင်ဝန်ထမ်းများကို ရှင်းလင်းမည်ဟု သတိပေးပြီးနောက် ပိတ်ထားသော စျေးများ ပြန်ဖွင့်ရန် မုံရွာစည်ပင်က လော်စပီကာဖြင့် လိုက်အော်
ရန်ကုန်၊ ဒီဇင်ဘာ၁၁
စစ်ကိုင်းတိုင်း၊မုံရွာမြို့နယ်ရှိ ဈေးများအားလုံး ပြန်ဖွင့်ကြဖို့ ဒီကနေ့ညနေ၄နာရီဝန်းကျင်ခန့်က ကားဖြင့်ပတ်ကာ လော်နှင့်လိုက်အော်နေတယ်လို့ မုံရွာဒေသခံတချို့က Regional News Agency သို့ ပြောဆိုပါတယ်။
ဒီကနေ့မနက်ပိုင်းမှာ မြို့ပေါ်ရှိအချို့ဈေးများကို စစ်တပ်ကဝင်ရောက်ဖျက်ဆီးပြီးနောက် နေ့လယ်ပိုင်းမှာ စစ်ကောင်စီလက်အောက်ခံ စည်ပင်က ကန်သာယာဈေးရှိ ဈေးဆိုင်များကို "စည်ပင်ခွင့်ပြုချက်မရှိဘဲ ဆိုင်မဖွင့်ရ"ဆိုတဲ့ စာရွက်တွေ ကပ်ထားခဲ့တာပါ။ အဲဒီလို ကပ်ပြီးတဲ့နောက် မြို့ပြပျောက်ကျားနှစ်ဖွဲ့က စည်ပင်ဝန်ထမ်းတွေကို ရှင်းလင်းမယ်လို့ သတိပေးစာထုတ်ပြန်ပါတယ်။
"ဒီနေ့နေ့လည်ပိုင်း ကန်သာယာဈေးမှာ စာရွက်တွေ လိုက်ကပ်နေတာကိုတွေ့တယ်၊စည်ပင်က ဈေးဆိုင်တွေမဖွင့်ရဘူးဆိုပြီး မနက်ကလည်း မြို့ပေါ်က ဈေးတချို့ကို သောင်းကျန်းသွားတယ်၊ခဏအကြာတော့ မြို့ပြပြောက်ကျားအဖွဲ့ကစာတစ်စောင် ထုတ်လိုက်တယ်၊ မကြာပါဘူးဗျာ ကားပေါ်မှာ လော်ကြီးတင်ပြီး ပြာပြာသလဲ ဈေးဖွင့်ကြဖို့ လိုက်အော်တော့တာပဲ" လို့ ဒေသခံတစ်ဦးက ဆိုပါတယ်။
မြို့ပြပြောက်ကျားအဖွဲ့နှစ်ဖွဲ့က စည်ပင်ဌာနအရာရှိကြီးတွေနဲ့ နေ့စားပါမကျန် ရှင်းလင်းသုတ်သင်မယ်လို့ ကြေညာချက်ထုတ်ပြီးတဲ့နောက် စျေးတွေ ပြန်ဖွင့်ဖို့ မုံရွာစည်ပင်က လိုက်လံ ကြေညာနေတာလည်းဖြစ်ပါတယ်။
(RNA သည် ရန်ကုန်ခေတ်သစ်၏ မဟာမိတ်သတင်းဌာနဖြစ်သည်)
Comments
Post a Comment