ရွှေမင်းဂံနယ်စပ်ကုန်သွယ်ရေးစခန်း၌ ဆယ်ရက်အတွင်း ကိုဗစ်ပိုးတွေ့သည့် စက်လှေသမား ၁၈ ဦးထိရှိလာ
◾ ရွှေမင်းဂံနယ်စပ်ကုန်သွယ်ရေးစခန်း၌ ဆယ်ရက်အတွင်း ကိုဗစ်ပိုးတွေ့သည့် စက်လှေသမား ၁၈ ဦးထိရှိလာ
ရခိုင်ပြည်နယ် စစ်တွေမြို့ရှိ ရွှေမင်းဂံနယ်စပ်ကုန်သွယ်ရေးစခန်းတွင် ဘင်္ဂလားဒေ့ရှ်နိုင်ငံမှပြန်လာသည့် စက်လှေသမား နှစ်ဦး၌ ယမန်နေ့(ဒီဇင်ဘာ ၁၀ ရက်)က ကိုဗစ်ပိုးထပ်မံတွေ့ရှိခဲ့ကြောင်း Rakhine Covid -19 Watch အဖွဲ့ထံမှ သိရသည်။
ကိုဗစ်ပိုးတွေ့ရှိသူများသည် ကာကွယ်ဆေးနှစ်ကြိမ်ထိုးထားပြီးသား ရွှေမင်းဂံနယ်စပ်ကုန်သွယ်ရေးစခန်းတွင် ကွာရန်တင်းဝင်နေသူများဖြစ်ပြီး ပိုးတွေ့ရှိသူများအား စစ်တွေပြည်သူ့ဆေးရုံသို့ ပို့ဆောင်လိုက်ပြီဖြစ်ကြောင်း သိရသည်။
စစ်တွေ ရွှေမင်းဂံနယ်စပ်ကုန်သွယ်ရေးစခန်းတွင် ပြီးခဲ့သည့် ဒီဇင်ဘာ ၇ ရက်က ဘင်္ဂလားဒေ့ရှ်မှပြန်လာသည့် လှေသမား ၇ ဦးနှင့် နိုဝင်ဘာ ၃ဝ ရက်ကလည်း ဘင်္ဂလားဒေ့ရှ်မှပြန်လာသည့် လှေသမား ၉ ဦး၌ ကိုဗစ်ပိုးတွေ့ရှိခဲ့သည်။
ထို့ကြောင့် ဒီဇင်ဘာ ၁၁ ရက်အတွင်း စက်လှေသမား ၁၈ ဦးအထိ ကိုဗစ်ပိုးတွေ့ရှိထားပြီဖြစ်ကြောင်း Rakhine Covid -19 Watch အဖွဲ့ တာဝန်ရှိသူတစ်ဦးကပြောသည်။
ဘင်္ဂလားဒေ့ရှ်သို့ကုန်သွယ်နေသည့် မြန်မာ-ဘင်္ဂလားဒေ့ရှ်နယ်စပ်ကုန်သွယ်ရေးကို ကိုဗစ်ဖြစ်ပွားမှုများလာ၍ ပြီးခဲ့သည့်နှစ်၊ သြဂုတ်လမှစတင်ကာ ၈ လခန့်ပိတ်ထားခဲ့ပြီး ယခုနှစ်၊ ဧပြီ၁၂ ရက်တွင် ပြန်လည်ဖွင့်လှစ်ခဲ့သည်။
ထို့နောက် ကိုဗစ်တတိယလှိုင်းအတွင်း ဇူလိုင် ၁၅ ရက်တွင် ထပ်မံပိတ်ထားခဲ့ရပြီး အောက်တိုဘာ ၁၆ ရက်က နယ်စပ်ကုန်သွယ်ရေးကို ပြန်လည်ဖွင့်လှစ်ခဲ့ရာ စစ်တွေ ရွှေမင်းဂံနယ်စပ်ကုန်သွယ်ရေးစခန်း၌ နိုဝင်ဘာ ၃ဝ ရက်မှစတင်ကာ ဘင်္ဂလားဒေ့ရှ်မှပြန်လာသည့် စက်လှေသမားများတွင် ကိုဗစ်ပိုးတွေ့ရှိလာခြင်းဖြစ်သည်။
Comments
Post a Comment